ಸ್ಥಾನಪಲ್ಲಟ

ಸ್ಥಾನಪಲ್ಲಟ

ಕಾಲಿಗೆ ಕಟ್ಟಿದ್ದ ಪಟ್ಟಿ ತೆಗೆದು

ಕಣ್ಣಿಗೆ ಕಟ್ಟಿ ಬಿಟ್ಟಿದ್ದಾರೆ

“ಇಗೋ ನಿನ್ನ ಸ್ವಾತಂತ್ರ್ಯ, ನಿನ್ನಿಚ್ಛೆ”
ನಿನ್ನೆ ತನಕ ನೆಲಕಚ್ಚಿ ನಿಂತಿದ್ದ ಕಾಲು

ತಳಬಿಟ್ಟು ಹಾರಿದೆ ಹೌಹಾರಿದೆ

ಕಟ್ಟಿಟ್ಟ ಕಣ್ಣಪಟ್ಟಿಗೂ

ನೆಗೆದಿಟ್ಟಿರುವ ಕಾಲ ಹೆಜ್ಜೆಗೂ

ನನ್ನೀ ಇರುವಿಕೆಯೆಂಬುದಿದೆಯಲ್ಲ – ಅಷ್ಟೇ ಅಂತರ!

ಓಟ ಪ್ರಾರಂಭ  

ಎಲ್ಲಿಗೆ? ಎಲ್ಲೆಲ್ಲಿಗೋ

ಸ್ವಾತಂತ್ರ್ಯಕ್ಕೆ ಸತ್ಯವೊಂದೇ  ಸರಹದ್ದು
ಬಿಟ್ಟಾಗ  ಓಡಿಬಿಡಬೇಕು

ಕಾಲೆಂದಿದೆ  “ನೀನೆಂದರೆ ನಾನೇ, ನಡೆ ಮುಂದೆ”

ತನಗೇನೂ ಕಾಣದ ಕಣ್ಣು  ಕೇಳಿದೆ

“ನೀ ಯಾರು? ನೀ ಯಾರು?”

ನಾನೆಂಬುದು ಯಾವುದೀಗ?
ಬಿಟ್ಟಿರುವ ಕಾಲೋ? ಕಟ್ಟಿರುವ ಕಣ್ಣೋ?

ಸ್ವಾತಂತ್ರ್ಯಪಟ್ಟಿ ತೆಗೆದೊಡನೆ

ಸುಟ್ಟು ಬೂದಿಯಾಗುವುದಿಲ್ಲ

ಸ್ಥಾನಪಲ್ಲಟವಾಗುತ್ತದಷ್ಟೇ

ನನ್ನದೇ ಇರಬಹುದು ಕಾಲು-ಕಣ್ಣೆರಡೂ

ಬೆಸೆಯಲಿ ಹೇಗೆ ಈಗೆಲ್ಲ

ನಾನೆಂದರೇನೆಂಬುದೇ ಪ್ರಶ್ನೆಯಾಗುಳಿದಿರುವಾಗ

ಕಳೆದ ಸ್ವಾತಂತ್ರ್ಯದ ಕಣ್ಣಹನಿ

ಕಾಲ ಸವೆದ ವೇಗದೋಟ

ನಡುವೆ ನಿಂತ ನನ್ನತನ

ಅಹೋ! ಅಹೋ!

ಕಣ್ಣಿದ್ದೂ ಕುರುಡಾದವರು ಓಟಕ್ಕಿಳಿದಿದ್ದಾರೆ

ನೆಲಕಚ್ಚಿ ನಿಂತವರೆಲ್ಲ ಸರಿದು ನಿಲ್ಲಿ!

ನಾಳೆ ನಿಮ್ಮ ಸರದಿ

ಕೊಟ್ಟಿರುವ ಪಟ್ಟಿ ಕೈಲಿ ಹಿಡಿದು ತನ್ನಿ!

                                               -- 19 -03 -2014

ನೀ ನೀನಾಗಿಹೋಗು!

ನಾ ನೀನಲ್ಲದ ಕಾರಣ

ನೀ ನಾನಾಗಬೇಕೆಂಬ

ಯಾವ ಹಂಬಲವೂ ಇಲ್ಲ

ಈ ಎಡಬಿಡಂಗಿ ಕನಸುಗಳ

ಹಠಾತ್ ಮರಣಕ್ಕೆ

ನೀ ಸಾಕ್ಷಿಯಷ್ಟೇ, ಕಾರಣವಲ್ಲ!

ಗೊಂಚಲು ಮನಸುಗಳ

ಎರವಲು ಕೊಂಡಿ

ಇಂದು ನಿನ್ನೆಯದಲ್ಲ

ಅದಕ್ಕೂ ಇತಿಹಾಸವಿದೆ

ಕಂಪಿಸಿದ್ದಷ್ಟೇ ಗೊತ್ತು ಉಸಿರು

ನೀನಿಟ್ಟ ಪ್ರಶ್ನೆ ಪ್ರಶ್ನೆಯಷ್ಟೇ

ಅದೇ ಕೊನೆಯಲ್ಲ!

ನೀನೂ ಒಮ್ಮೆ ಹಾಗೇ

ಕತ್ತೆತ್ತಿ ಯೋಚಿಸಿನೋಡು

ಆಕಾಶ ಅದೆಷ್ಟು ಸುಳ್ಳೆಂದು

ಉತ್ತರ ಸಿಕ್ಕರೂ ಸಿಗಬಹುದು

ನಾ ಸುಮ್ಮನಿದ್ದ ಆ ಪ್ರಶ್ನೆಗೆ

ಕಾರಣ ಬೇಕೇ

ಸಮಯಾಂತರ ಸರಿದಾಡಲು

ತುಡಿತವೇ ಹಾಗೆ

ಸರಿದು ನಿಲ್ಲುವುದಿಲ್ಲ

ನಾ ನೀನಾಗಬೇಕೆಂಬ ತುಮುಲ

ಸಾಧ್ಯವಿಲ್ಲದ ಪ್ರತಿಕ್ಷಣ

ನೀ ನಾನಾಗಲಿಲ್ಲವೆಂಬ

ಯಾವ ಬೇಸರವೂ ಇಲ್ಲ

ಬಂದುಬಿಡು ತಿರುಗಿ ಬೇಕೆನಿಸಿದಾಗ

ನಿನ್ನಿಚ್ಛೆಯಂತೆಯೇ ಆಗಲಿ

ಸೋತ ಪ್ರಶ್ನೆಗಳ ಹಿಸುಕಿ ತೆಗೆದು

ಮತ್ತೆ ಉತ್ತರ ಹುಡುಕೋಣ

ಸ್ವಚ್ಛಂದ ತಿರುಗಿರುವ

ನಾಳೆಗಳ ಬಲವಂತ ಹಿಡಿದು

ಮತ್ತೆ ಕನಸಕಟ್ಟೋಣ.

**** 

                                                          -- [14-12-2013]

ಎರಡೇ ಎರಡು ಹೆಜ್ಜೆ!

ಎರಡೇ ಎರಡು ಹೆಜ್ಜೆ ! 

ಕೆಂಬಣ್ಣ ಬಳಿದಿದೆ

ಆ ನೀನೆಂಬ ನಗುತಿರುವ

ಬರಿಯ ಭಾವಚಿತ್ರಕ್ಕೆ

ಹೀಗೆಯೇ ಕತ್ತೆತ್ತಿ ನೋಡಲು

ನಿನ್ನೆ ಕಂಡ ನಕ್ಷತ್ರ ಇಂದಿಲ್ಲ!

ನೀ ಕಾಂಬ ಆ ಭಾವಚಿತ್ರವೋ

ಜಗವರಿಯದ ಬಯಕೆಗಳ ಗುಚ್ಚ

ಗೂಡ ತೊರೆದು ದೂರ

ಹಾರಿದ ಹಕ್ಕಿ

ನೀನಿಟ್ಟ ಹೆಜ್ಜೆಯಲ್ಲ

ಪಯಣಿಸಿದ ದಾರಿ

ಕಟ್ಟಿಟ್ಟ ಬುತ್ತಿಯಲ್ಲ

ನಡೆದುಬಂದ ರೀತಿ

ಕೊಟ್ಟ ಮಾತಲ್ಲ

ಪಟ್ಟ ಪರಿಶ್ರಮ

ಬಿಟ್ಟ ಬಯಕೆಯಲ್ಲ

ನೆಟ್ಟ ನೆನಪಿನ ಗಿಡ

ರಾತ್ರಿಯೆಂಬ ಮಾಯೆ

ಹಗಲಾಗಲಿ ಕಳೆದು

ತಿಳಿದೋ ತಿಳಿಯದೆಯೋ

ಮತ್ತೆ ಸಾವಿರ ಜನ

ಹುಟ್ಟುತ್ತ ಬದುಕಾಗಿ

ಬದುಕೆಲ್ಲ ನೆಪವಾಗಿ

ನೀನೇ ಹೇಳು

ಹಚ್ಚಿದವ ಹುಚ್ಚ

ದೀಪಕ್ಕೇನು ಬೆಳಗಲು?

ನೆಟ್ಟವ ಕಳ್ಳ

ಗಂಧದ ಗಿಡಕ್ಕೇನು ಬೆಳೆಯಲು

ಸಂಬಂಧವಿಷ್ಟೇ ಕರ್ತೃ-ಕಾರಣ

ಇಡಬಾರದಿತ್ತೇ ಇನ್ನೇರಡೇ

ಹೆಜ್ಜೆ ನೀ ಹಿಂದಕ್ಕೆ

ಮೆಟ್ಟಿ ನಿಲ್ಲಲು

ಬಿಟ್ಟು ನಡೆದಿದ್ದ ಆ ಚಪ್ಪಲಿಯ ಮತ್ತೆ?

ಬಂದುನೋಡು ಇಂದು

ಬಣ್ಣ ಬಳಿದ ಆ ಭಾವಚಿತ್ರಕ್ಕೂ

ನೀ ಬಿಟ್ಟುಹೋದ ಜೊತೆ

ಚಪ್ಪಲಿಗೂ ಅಂತರವೆಷ್ಟೆಂದು

ಆ ಎರಡೇ ಎರಡು ಹೆಜ್ಜೆ!

                                          

                                                                               
                                                                   -- 12-10-2013

{ಅರ್ಪಣೆ:  ಪ್ರತಿಭಾವಂತ ಕವಿ-ಕಾದಂಬರಿಕಾರ-ಲೇಖಕ ದಿ|| ಗ.ಸು.ಭಟ್ಟ ಬೆತ್ತಗೇರಿ}