ಆರದ ದೀಪ

ನಿಂತುಬಿಟ್ಟ

ಎಲ್ಲಿ ಏಕೆ ಹೇಗೆ ನೆನಪಿಲ್ಲ

ಬಿದ್ದ ಮಳೆಗೆ ಬೇರು

ತಂಪಾಗಿಹೋಯಿತಿರಬೇಕು

ಸೇವಿಸಿರಬೇಕು ದೇಹ

ಸಾಕಷ್ಟು ಗಾಳಿ

ಅನಿಸಿರಬೇಕು

ಮತ್ತೇಕೆ ಇನ್ನೇಕೆ

ನಿಂತುಬಿಟ್ಟ

ಕತ್ತೆತ್ತಿ ಹೇಳಿದ್ದ ಅಂದೇ

‘ಲೇಖನಿಗಿನ್ನೆಷ್ಟು ತುಂಬಲಿ ಶಾಯಿ

ಮುಖಕಿನ್ನೆಷ್ಟು ಬಳಿಯಲಿ ಬಣ್ಣ

ನೋಯ್ದಿದೆ ಮನವೆಲ್ಲ

ಇನ್ನೆಷ್ಟು ಕಣ್ಣರಳಿಸಿ ನೋಡಲಿ ನಾ’

ಸುತ್ತಿರುವ ವೃತ್ತಪರಿಧಿಯ ಸುತ್ತ

ಹಿಂದೆಯೂ ಮುಂದೆಯೂ

ಎಡಕ್ಕೂ ಬಲಕ್ಕೂ ಚಲಿಸದೇ

ನಿಂತುಬಿಟ್ಟ ಹಾಗೇ

ತಿರುಗೇ ತಿರುಗುವ

ಭೂಮಿಯ ಮೇಲೆ

ಸವೆದ ಹೆಜ್ಜೆಗೇನು ಬೆಲೆ

ಅಕಾರಣ ಇನ್ನೆಷ್ಟು ನಡೆಯಲಿ

ಎಂದೋ ಏನೋ

ನಿಂತಲ್ಲೇ ಕಣ್ಮುಚ್ಚಿ ಕುಸಿದುಹೋದ

ಲೇಖನಿಯ ಮುಚ್ಚಳಿಕೆಯಿನ್ನೂ

ತೆರೆದಿರುವಾಗಲೇ

(08-03-2017)

ಸುಲಭದ ಲೆಕ್ಕ

 ಸುಲಭದ ಲೆಕ್ಕ
 
ನಾನು ಏಕಗತಿಯ ದ್ವೇಷಿಸುವವ
ನಾಲ್ಕೂ ದಿಕ್ಕಿಗೆ ಬಾಣ ಬಿಡಲು ಹಾತೊರೆಯುವವ
ಅದೂ ಒಟ್ಟೊಟ್ಟಿಗೇ
ನಗುವವ
ಅಳಲು ಬಯಸದವ
ಮೆರೆಯುವವ
ಮರೆಯುವವ
ನಿನ್ನೆ ಇಂದು ಮತ್ತೆ ನಾಳೆಯ

ಹಾಗೂ
ನಾನು ಸೋಲಲೊಲ್ಲದವ
ತಲೆ ಮೇಲಿನ ಸೂರ್ಯಗೇ ಸವಾಲೆಸೆಯುವವ
ಬೆಳೆಯುವವ
ಬೀಗುವವ
ಕುಗ್ಗಿಸಿ ಕುಣಿಯುವವ

ನಾನು
ತಾನು ಮಾತ್ರ ನಾನೆಂದು ನಂಬಿದವ
ಒಳಗೊಳಗೇ
ಕುದಿಯುವವ
ಕದಿಯುವವ
ಲಾಸ್ಯಕ್ಕೆ ಒಗ್ಗುವವ
ದಾಸ್ಯಕ್ಕೆ ದಣಿಯದವ

ನಾನು
ಅಂಕಗಣಿತದ ಮೊದಲ ಪುಟದ ಲೆಕ್ಕ
ಬಿಡಿಸಲು ತೀರಾ ಸುಲಭದವ
ನಿನ್ನೆ ಹುಟ್ಟಿ
ಒಂದೇ ದಿನ ಬದುಕಿದವ

ಕನ್ನಡಿ ಮುಂದೆ ನಿಂತು
ಅವಳೋ ಅವನೋ ಆಗಬಯಸುವ
ನಾನು
ಅಂತೂ ಕೊನೆಯ ಸಾಲು ತಲುಪಿರುವ ನೀವೇ

-- 06-01-2017

ಸಮಯ

ಬರೆಯುವಷ್ಟೇ ಸಾಲುಗಳಲ್ಲಿ ಅವಿತಿದ್ದರೆ

ಅದೇನೋ ಬೇರೆ

ಹಾಳೆಗಳ ಹೊರಗೂ ಹೋಗಿ ಹರಟುವೆಯಲ್ಲ

ಬಿಡಲಿ ಹೇಗೆ?

ಅಲೆಯ ರಭಸಕ್ಕೆ ಎದುರಾಗಿ

ನಾನಾಗಿಯೇ ತಲೆಕೊಟ್ಟರೂ

ಕವನ ಬರೆಯುವ ಕಲೆ ಮರೆಯಿತೇ ಹೊರತು

ನಿನ್ನ ನೆನಪಲ್ಲ

ಸಮುದ್ರವಾಗಿಬಿಡು ನೀ

ನಾ ನದಿ ನೀರಾಗುವೆ

ಬಾರಿ ಬಾರಿ ಭಾರೀ ಭಾರ

ದಾಹ ತೀರದಷ್ಟು ದೂರ ತೀರ

ಆಚೆಗಿರಲಿ ಕೊನೆಗೆಂದೋ ಸಿಗುವ ಫಲ

ಪ್ರಯತ್ನಿಸಲೂ ಕೊಡದೇ ಕಾಡುವೆಯಲ್ಲ

ಕಾಯಲಿ ಹೇಗೆ?

ನೆನಪಿಡು

ನಾನೂ ನಿಂತಿರುವೆ

ನಿನ್ನಂತೆಯೇ

ರಂಗಸ್ಥಳದ ಮೇಲೆ

ಬಣ್ಣ ಬಳಿದುಕೊಂಡು

ಕಣ್ಣರಳಿಸಿಕೊಂಡು

ನಗೆತೊಟ್ಟುಕೊಂಡು

ಒಳಗೊಳಗೇ ಕನವರಿಸಿಕೊಂಡು

ಪ್ರತಿದಿನ ಪ್ರತಿಕ್ಷಣ

ಓ ಸಮಯ

ಸಮುದ್ರವಾಗಿಬಿಡು ನೀ

ನಾ ನದಿ ನೀರಾಗುವೆ

  

--07-Oct-2016

ನಿಲ್ಲು

ನಾನು

ಹಲವು ದಿಕ್ಕುಗಳ ಕಡೆಗೆ ನಡೆವೆ

ನಿನ್ನೊಟ್ಟಿಗೆ

ನೀನ್ಯಾರು?

ಅದೋ ಗಾಳಿ

ನೀರು

ಭೂಮಿ

ಹುಟ್ಟುತ್ತ ದಣಿಯುತ್ತ ಸಾಯುತ್ತ

ನಿನ್ನ ನಲುಮೆ

ಇರುವುದಷ್ಟೇ ಗೊತ್ತು

ಹುಟ್ಟಿಲ್ಲ ದಣಿವಿಲ್ಲ ಸಾವಿಲ್ಲ

ಆಕಾರ

ನನ್ನೀ ಯೋಚನೆ

ಭಾವನೆ

ಕಲ್ಪನೆ

ಹೆದರಿ ಹೌಹಾರಲು

ನಿರಂತರ ತಳಮಳ

ಎಲ್ಲಿ?

ಪ್ರೀತಿ ತೆನೆ ನಿರಾಕಾರ

ಎಲ್ಲಿ?

ಗ್ರಹಿಕೆಗಿದೆ ಕಾಣುತ್ತಿಲ್ಲ

ಭರವಸೆ

ಬಯಕೆಗೆ

ಮನಸಿಗೆ

ಬದುಕುವ ಭಾವಕ್ಕೆ

ಹೇಗೆ?

ಕತ್ತೆತ್ತಿ ನಿಂತರೆ

ಆಕಾಶ ತೆರೆದಿಡುವ

ಅಸಂಖ್ಯ ನಕ್ಷತ್ರ

ತವಕ

ಚಿಗುರಿಗೆ

ಪಾಡ್ಯಕ್ಕೆ

ನಸುಕಿಗೆ

ಏಕೆ?

ಗೆಲುವಿಗೆ

ಹಿಂದೆಲ್ಲೋ ಸೋತ ತಾಳ್ಮೆ

ಓಡಲು

ಬೆಳೆಯಲು

ನಾನ್ಯಾರು?

ಇರುವಿಕೆಯ

ಕಲಿತಿಲ್ಲ

ಇತಿಮಿತಿಯ

ಅರಿವಿಲ್ಲ

ನಿಲ್ಲು

ನಗು

ಬೆರೆ

ಕಣ್ತೆರೆ

ಸಿಲುಕು

ನಾನೆಂಬ ಪ್ರಯತ್ನದ ಮುಂದೆ                                                    

ಕಡಲು ನೀನು

ಸುಮ್ಮನೆ ತೆರೆಮರೆಯ ನಾಟಕ

ಹೊರಗಷ್ಟೇ ತೋರಿಕೆಯಾರ್ಭಟ

ಒಳಗೆಲ್ಲ ಭಯಂಕರ ಮೌನ

ಮರೆವೆಂಬ ಹೆಸರಿನ ನೆನಪು ನೀನು

ಹೇಳು

ಕೊನೆಯಬಾರಿ ನಾನೇನಾದರೂ

ಯಾರಿಗಾದರೂ ಕೊಟ್ಟಿರುವುದಿದೆಯೇ?

ಕಣ್ಮುಂದೆ ಜಾರುತಿರುವುದೆಲ್ಲ

ಬರೀ ತೆಗೆದುಕೊಂಡವುಗಳೇ

ಹೇಳಿಬಿಡು ಲೆಕ್ಕಮಾಡಿ

ನೀ ಕೊಟ್ಟ ಘಳಿಗೆಗಳ

ಮರಳಿಸಲು ಏನಿಲ್ಲ

ಹೀಗಿರುವ ನಾನೇ ಎಲ್ಲ

ದೇಹಭಾಷೆ ಮನದ ಆಸೆ

ಭಿನ್ನವಾದ ಮಾತ್ರಕ್ಕೆ

ಕಡಲಸೇರ್ವ ನದಿಯು

ತಾನು ನಿಂತುಹೋದೀತೇ?

ಬರುವುದಿಲ್ಲ ನೋಡು

ಸಮಯಕ್ಕೆ ಹೆಜ್ಜೆ ಹಿಂದಿಡಲು

ನಾನು ನೀನೆಲ್ಲ ಇದರ ಸಿಲುಕುಗಳೇ

ನಿನ್ನೆಯೆಂಬುದು ನಿಜಕ್ಕೂ ನಿರ್ಜೀವ

ಇಂದು ನಾನೇ ಇಲ್ಲ ನಾಳೆ ಹುಟ್ಟಿಲ್ಲ

ನಡೆದೇಹೋಯಿತೆಂಬಬದಿಗೆ

ಸುಮ್ಮನಾಗದೇ

ಬರಿದೆ ಮಾತು ಕಳೆದುಹೋಗಿ

ಹೊರಟೇಹೋದೆ ನೀ

                                                     -- 26-10-2015

 ಈ ನಾನು ನಾನಲ್ಲ

ನಡೆಯಲು ಬರುವುದೆಂದಾದಮೇಲೆ ನಡೆಯುವುದು ನಿಯಮ
ಓಡುವುದು ನಿಯಮವಲ್ಲ ಖಯಾಲಿ
ಈಗ ತಾನೆ ಕಾಲ್ಕೊಟ್ಟು ನಿಂತ ಮಗುವಿಗೆ ಖಯಾಲಿಯೇ ಖುಷಿ ನಿಯಮವಲ್ಲ
ಓಡುತ್ತದೆ
ಬಿದ್ದರೂ ಸೈ ಓಡುತ್ತದೆ
ಬಿದ್ದು ಅತ್ತು ಎದ್ದು ಮತ್ತೆ ಓಡುತ್ತದೆ
ನಡೆಯುವ ನಿಯಮ ಅದಕ್ಕಿನ್ನೂ ತಿಳಿದೇಯಿಲ್ಲ
ಸಾವಕಾಶವಾಗಿ ತಿಳಿಯುತ್ತದೆ
ಅಲ್ಲಿಂದಲೇ ನಡಿಗೆ ಶುರು
ಅಳುಕುತ್ತ ಅತ್ತಿತ್ತ ನೋಡುತ್ತ ನಡೆಯಲು ಪ್ರಾರಂಭಿಸುವುದು
ಈಗಿನ ನೀವೇ ಆಗಿನ ಆ ಮಗು
ನಡೆಯುತ್ತ ಸಾಗಲು ಮುಂದೊಮ್ಮೆ ನಿಮಗೆ ಏನೇನೋ ಕಾಣಿಸುತ್ತವೆ
ದಾರಿಯಲ್ಲೊಂದು ಕಲ್ಲಿನಂತಹದ್ದೇನೋ ಕಾಣಿಸುತ್ತದೆ
ನೀವು ಕೈಗೆತ್ತಿ ನೋಡಲು ಚಿನ್ನ ನೋಡಿದ ಅನುಭವ
ಹೌದು ಚಿನ್ನವೇ ಇರಬೇಕು
ನಿಮ್ಮ ಕಥೆ ಅಲ್ಲಿಂದಲೇ ಶುರು
ಕುದುರೇಗೇನೋ ಕಟ್ಟುತ್ತಾರಲ್ಲ ಅತ್ತಿತ್ತ ನೋಡದೇ ಮುಂದೆ ಸಾಗಲು
ಅದಕ್ಕೆ ಏನೆನ್ನುತ್ತಾರೋ ತಿಳಿದಿಲ್ಲ
ಗುರಿಯೆಂದು ಕರೆಯುವೆ
ಚಿನ್ನ ಕಂಡ ನಿಮ್ಮ ತಲೆಗೆ ಗುರಿ ಕಟ್ಟಿಕೊಳ್ಳುತ್ತದೆ
ದಾರಿಯಾಕಡೆಯೀಕಡೆ ಕಾಣುವ ನಾಯಿ ಬೆಕ್ಕು ಹಕ್ಕಿ ಮೀನು ಹಾವು ಎತ್ತು ಮಿಂಚುಳು
ನಿಮಗೆ ನಿರ್ಜೀವ ಕಲ್ಲಿನಂತೆ ಕಾಣಿಸುತ್ತವೆ
ಚಿನ್ನದಲ್ಲಿ ಜೀವ
ಏಕೆಂದರೆ ಅವುಗಳಿಗೆ ಕಲ್ಲುಚಿನ್ನವೆಲ್ಲವೊಂದೇ ನಿಮಗಲ್ಲ
ನನಗೂ ಅಲ್ಲ
ಈಗಿನ ನಾನೇ ಆಗಿನ ಆ ಮಗು
ತಡೆಯಿರಿ
ಏನೋ ಕಂಡಂತಿದೆ
ತೆಲೆಮೇಲದೊಂದೇನೋ ಕಟ್ಟಿಕೊಂಡಿರುವುದಿದೆ
ನಿಯಂತ್ರಿಸಲು ನಿಯಮಗಳೂ ಇದೆ
ಈ ನೀವು ನೀವಲ್ಲ
ಈ ನಾನು ನಾನಲ್ಲ



(24-05-2015)