ನಿನ್ನದೇನು ನಿನಗೇನು ನಿನ್ನದೆಷ್ಟು

ಹಾಗೆಲ್ಲ ಕಾಣಿಸದ
ಕನಸೆಂಬುದು ಕಣ್ಮುಚ್ಚಿ
ತಾನು ತೊಟ್ಟ ಬಟ್ಟೆ ಬಿಚ್ಚಿ
ಬಳಿ ಕರೆಯಲು ಹೋಗಿ
ಇನ್ನೇನು ಮೈದವಡುವುದೊಂದೇ
ಬಾಕಿಯಿರಲು ಇಷ್ಟೊತ್ತು
ತೆಪ್ಪಗೆ ಕೂತಿದ್ದ ಕೆಪ್ಪು ಕಿವಿ
ನಿಮಿರಿ ಚುರುಕಾಗಿಹೋಯಿತು
ಯಾರೋ ಪಿಸುಗುಟ್ಟುವ ಹಾಗೆ
“ನಿನ್ನದೇನು?”

ಸುಲಭಕ್ಕೆ ಕೈಗೆಟುಕದ
ತಣ್ಣನೆಯ ಗಾಳಿಗೋ
ದಿಕ್ಕು ಹಲವು ಆದರೆ
ಆಯ್ಕೆಯೊಂದೆ ಎಂದು
ನಾನೆಂದುಕೊಂಡಿರಲು
ಹಾಗೇ ತೂರಿಬಂದ
ಆಲದೆಲೆಯೊಂದು ಟಪ್ಪನೆ
ಕೆನ್ನೆಗೊಡೆದು ಹೋಯಿತು
ಮುಚ್ಚಿಹೋದ ಕಣ್ರೆಪ್ಪೆಯ
ಸಾವಕಾಶ ತೆರೆಯಲು
ಮನಸಲ್ಲೇನೋ ಭಾವ
“ನಿನಗೇನು?”

ಬರೀ ಸಂಬಂಧಗಳಾಟ
ಭಾವನೆಗಳೋಟ
ಸಮೀಕರಿಸಿ ನಿನ್ನೆಗಳ
ಬಿಡಿಸುವುದರೊಳಗೇ ಕಣ್ಮುಂದೆ
ನಾಳೆಯೆಂಬ ಭಿನ್ನರಾಶಿ
ಇದರೊಳಗೇ ಅಪ್ಪೀತಪ್ಪಿ
ಇಂದೆಂಬ ಭಾಷೆಯ
ಪುಸ್ತಕ ತೆರೆಯಲು ಬರೆದಿದೆ
ಮೊದಲ ಪುಟದಲ್ಲೇ
“ನಿನ್ನದೆಷ್ಟು?”

-- 04 Spet 2018