ಹತ್ತು ಹೂವ ಕಿತ್ತು
ಆಚೆ ಕಾಲನೆತ್ತಿಡಲು
ಕಚ್ಚಿತೊಂದು ಮುಳ್ಳು
ಸಿಟ್ಟಲ್ಲಿ ಶಪಿಸಲಾಯಿತು
ಮತ್ತೆ ನಾಳೆ ಬರಲು
ಅದೇ ಹೂವ ಕೀಳಲು
ಕನಸು ಕಂಡ ರಾತ್ರಿ
ಬೆಳಗಾಗಿ ಕಣ್ಬಿಡಲು
ಕಟ್ಟೆಯೊಡೆಯಿತು ಕನವರಿಕೆ
ಜಾರಿಹೋದ ಅನುಭವ
ಸುಳ್ಳು ಸತ್ಯಗಳ ನಡುವೆ
ವಸ್ತುವದೊಂದಕ್ಕೆ ತಾನು
ಕದಲದಿರಲು ಬೇಕು
ಅದೇನೋ ಶಕ್ತಿ
ನಾನು ನಾನಾಗಿಯೇ
ಇರಲೂ ಕೂಡ
ಭಾವಕ್ಕೆ ಅದಾಗಲೇ
ಬಣ್ಣ ಬಡಿದಿದ್ದೇನೆ
ನೋಡುವ ಕಂಗಳಾದರೂ
ಮುಸಿನಗಲೆಂದು
ಒಳಗಿನ ಬಣ್ಣಕ್ಕೆ ಬೆಲೆ ಕಡಿಮೆ
ಎಟುಕುವುದೇ ಸತ್ಯ ಸುಲಭಕ್ಕೆ
ಗಾಳಿಗೆ ಬಿದ್ದ ಈ ಹಗುರ
ಆಸೆಯ ತುಂಡುಗಳು
ಅದೆಲ್ಲೋ ಸಾಗಿವೆ
ನಿನ್ನೆ ನಾಳೆಗಳ ನಡುವೆ
ನೆಲ ತಲುಪಲೊಲ್ಲದೇ
ತೆರೆದ ಮುಗಿಲ ಕಡೆಗೆ
-- 29-Oct-2017
No comments:
Post a Comment